Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Ҳақиқий мўмин киши ўзидан, Парвардигоридан рози бўлади. У аниқ ишонч билан биладики, Аллоҳ таоло у учун бир нарсани тақдир қилиши у ўзи учун бир нарсаларни режа қилишидан афзал. Аллоҳ таолонинг меҳрибонлиги ота-онасининг меҳрибонлигидан улкан. У Парвардигорига шундай муножот қилади: “Барча яхшилик Сенинг қўлингда. Албатта, Сен ҳар бир нарсага қодирсан” (Оли Имрон сураси, 26 оят).

Норози кишилар розиликнинг лаззатидан маҳрумдир. Улар атрофидаги фойдаланаётган неъматларни ҳис қилмайдилар. Улар бу неъматларга ўрганиб қолган ёки унга осонлик билан эришганлар. Улар доим фалон, фалон нарсамиз кам, фалон, фалон нарсани хоҳлаймиз дейдилар. Лекин, фалон, фалон нарсамиз бор, демайдилар.

Мўмин киши атрофидаги ҳар бир нарсада Аллоҳ таолонинг неъмати борлигини ҳис қилади. Ер юзидаги ёки осмондаги ҳар бир заррада Аллоҳ таолонинг неъматини кўради. У ҳар лаҳза, ҳар ҳолатда Аллоҳ таолонинг неъматларидан рози бўлади.

Доктор Ҳассон Шамсийнинг  "Бахт улашинг" китобидан

Раҳматуллоҳ Махсумхонов  таржимаси