Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ рози бўладиган хулқлар соҳиби
Бисмиллаҳир роҳманир роҳийм.
«Ва албатта, сен улкан хулқдасан» (Қалам сураси, 4-оят).
Ассалому алайкум! Ушбу ояти карима ҳақида “Тафсири Ҳилол” китобида қуйидаги шарҳ ёзилган: “Бу ояти карима Пайғамбаримиз соллаллоҳу алайҳи вассалам учун катта баҳодир. Аллоҳ таоло у зотнинг сифатларини улуғлик билан сифатламоқда. Оиша онамиз розияллоҳа анҳодан у кишининг хулқлари ҳақида сўрашганда: “Хулқлари Қуръон эди” деб жавоб берганлар. У зот Қуръондаги барча олий хулқлар билан хулқланган эдилар.
Пайғамбаримиз соллаллоҳу алайҳи васаллам: “Мен яхши хулқларни батамом қилиш учун юборилганман”, деганлар. Бошқа бир ҳадисда эса: “Киши яхши хулқи билан кундузи рўза тутиб, кечасини намоз ўқиб ўтказадиганлар даражасига етади”, деганлар”. Хулоса қиладиган бўлсак, Ислом динида одоб-ахлоқ масалалари энг илгари турадиган масала ҳисобланади. Бунга алоҳида эътибор берилганлигига эса юқоридаги ояти карима далилдир.
“Софват ут-тафасийр” китобида эса бундай дейилган: “Аллоҳ таоло сизда барча фазилату камолотни жамлади. Эй буюк шараф эгаси, сизнинг буюклигингиздек инсонни башар кўрмаган”. Пайғамбар соллаллоҳу алайҳи васаллам – ҳалим, ўта ҳаёли, кўп ибодат қилувчи, саховатпеша, сабрли, кўп шукрли, тавозули, зоҳид, раҳмдил, шафқатли, гўзал муомалали, одобли ва барча улуғ сифатлар ҳамда илм эгаси. Аллоҳ рози бўладиган хулқлар соҳиби бўлишлик у Зот соллаллоҳу алайҳи васалламга Аллоҳнинг гўзал тақдиридир.
Бухорий ва Муслимдан ривоят қилинган ҳадиси шарифда шундай дейилади: «Анас розияллоҳу анҳу: “Мен Расулуллоҳга 10 йил хизмат қилдим. Шу давр ичида менга бирон марта “уф” демадилар. Бирон қилган ишимга “нега буни қилдинг”, бирон қилмаган ишимга “нега буни қилмадинг” демадилар. У Зот хулқ жиҳатидан инсонларнинг энг гўзали эдилар”, дедилар».
