Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Эмизаётган онанинг ҳолати боланинг руҳиятига таъсир этади. Бу ҳолат асосий аҳамият бериладиган муҳим ишлардан бири саналади. Шуни яна таъкидлаб айтаманки, онанинг руҳий ҳолати боланинг руҳий ва жисмоний ривожланишига катта таъсир кўрсатади! Жаҳл қилиб ёки бефарқ, қўлда телефон билан эмизиш боланинг руҳиятига салбий таъсир кўрсатиши оқибатида гўдакда иситма, йиғлоқилик, инжиқ, вазн ошмаслик ҳолатлари кузатилади.
Оталар, фарзандларингиз ланж, нимжон, касалманд бўлмаслиги учун фарзандингизнинг онасини асраб-авайлашга ҳаракат қилинг. Бўлар-бўлмасга айблаб, камситманг, ортиқча талаблар қўймай турганингиз маъқул. Она қонидаги темир, кальций, магний, йод ва Д витаминлари етишмовчилиги эса фарзандингизни ҳар томонлама соғлом бўлиб улғайишига салбий таъсир кўрсатади. Шу боис имкон қадар соғлиғига беэътибор бўлмасликларини мутахассис сифатида истардим. Яхши муомала қилиш, меҳр-мурувват кўрсатиш ва витаминга бой озиқ-овқатлар билан таъмилаш нафақат аёлингизга, балки фарзандингизга ҳам фойдалидир.
Наргиза Қурбонова, шифокор
