Болам ёлғон сўзлаяпти...
Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Бола тарбиясига оила муҳитининг таъсири жуда катта. Фарзандлар биринчи бўлиб ота-онасининг гап-сўзи, хулқи, муомаласидан андоза олишади. Кўчада бир аёлнинг ҳасрат билан «Болам ёлғон сўзлаяпти...» деганини эшитиб қолдим. Болалар рост ёки ёлғон гапиришни кимдан ўрганишади? Жавоби оддий — ота-онасидан.

 Абдулқодир Гилоний ҳазратларининг болалик чоғларида кечган бир воқеа жуда ибратли. Макка сафарига отланган карвонда илм олиш ниятида йўлга чиққан ёш Абдулқодир ҳам бор эди. Саҳрога етганларида карвон қароқчилар ҳужумига учрайди. Бор нарсаларини талон-тарож қилади. Қароқчилар бошлиғи Абдулқодирга яқин келиб:

— Сенинг ниманг бор? — сўрайди. — Қирқ тиллам бор. — Қани улар? — Чопонимнинг этагига тикилган. Қароқчи олдинига боланинг гапига ишонмайди. Яна сўрагач, Абдулқодир тилла тангаларини чиқариб беради. Ўзи айтмаса, қароқчилар билишмасди, аммо сафарга отланаётиб, онасига ёлғон гапирмасликка ваъда берган эди. Ўша ваъдасига содиқ иш тутди. Боланинг рост гапи тўдабошига қаттиқ таъсир қилиб, тортиб олинган молларни эгаларига қайтариб беради. Бу «ҳунар»идан бутунлай воз кечади. Онасининг «Ҳеч қачон ёлғон гапирмасликка ваъда бер» деган сўзи фарзанди учун нега бунча қадрли бўлган? Чунки меҳрибон онанинг ўзи ростгўйлик қадрини англаган ва бутун ҳаётини шу асосга қурган. Нега биз бугун боламизга «ёлғон айтма» десак ҳам яна алдайверади? Чунки ўзимизнинг сўзимизда ёлғон бор. Сўраб келган одамга боламиздан «Уйда йўқлар» деб айттирамиз ёки қўнғироқларга «Йўқ эдилар» деб жавоб беришни буюрамиз. Оддий юмушларда ҳам фарзандимиз кўз олдида ёлғон ишлатаверамиз. Болалар – оила ойналари.«От изини той босади», дегани каби фарзанд ҳам ота-она изидан улғаяди. Айтганларини, қилганларини қайтаради. Вояга етиб ҳам уларнинг изидан боради. «Онасини кўриб қизини ол» нақли ниҳоятда ўринли. Аллоҳ таоло айтади: «Эй мўминлар! Аллоҳдан қўрқинглар ва тўғри сўзланглар!» (Аҳзоб ,70). Аллоҳдан қўрққан банда рост гапиради. Фарзандларимиз яхшихулқли одобли бўлишларини истасак, уларга рост гапиришни ўргатишимиз керак. Расулуллоҳ соллаллоҳу алайҳи васаллам: «Ростгўйликда хавфу хатар кўрсаларинг ҳам, рост сўзланглар, шунда нажот топасизлар. Гарчи фойда кўриб турган бўлсаларинг-да, ёлғондан сақланинглар. Чунки барибир, ёлғоннинг охири вой», деб марҳамат қилганлар (Ибн Можа). Фарзандларимизга рост сўзлашни, чиройли одобни мерос қилайлик.
Зебунисо ҲУСАЙН қизи
Мавзуга оид мақолалар
Фарзанд отаонанинг келажаги, умиди, орзуси, бойлиги, чексиз қувончи, суянган тоғидир. Бўлажак она эса фарзандининг соғлом, кўркам, бақувват бўлишини бутун вужуди давоми...

01:40 / 27.10.2016 2532
Вақт инсоннинг умри ва ҳаётидаги сармоясидир Аллоҳ таоло инсон зиммасига бир қанча мажбуриятларни юклар экан, уларни адо этишини талаб қилди. У Зот бандаларига давоми...

11:00 / 22.10.2019 955
Қадимги Хитойда турмушга чиққан қиз эрининг уйида яшаб, унга ва унинг онасига хизмат қилиши керак эди. Шундай урфодатларга мувофиқ турмуш ўртоғининг хонадонида давоми...

01:23 / 30.11.2016 5574
Энг гўзал хулқ эгаси Бисмиллаҳир Роҳманир Роҳийм  Аллоҳ таоло Ўз каломи шарифида Ва албатта, сен улкан хулқдасан Қалам сураси, 4оят, дея марҳамат қилади. Ушбу давоми...

23:55 / 13.12.2017 1040