Жума кунида намозга нидо қилинган пайтда Аллоҳнинг зикрига шошилинг ва савдони қўйинг
Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Бисмиллаҳир Роҳманир Роҳим

«Эй, иймон келтирганлар! Жума кунида намозга нидо қилинган пайтда Аллоҳнинг зикрига шошилинг ва савдони қўйинг. Агар билсангиз, бу ўзингиз учун яхшидир».

(Жумуъа сураси, 9 оят)

Жума куни ҳафта кунлари ичида энг фазилатлиси ҳисобланади. Пайғамбар алайҳиссалом: «Қуёш чиқиб турган кунларнинг энг яхшиси жума кунидир. Ўша куни Одам яратилган, жаннатга киритилган, жаннатдан чиқарилган. Қиёмат ҳам жума куни қоим бўлади», деганлар. Оятдаги «намозга нидо қилинган пайтда»дан мурод имом минбарга чиққандан сўнг айтиладиган иккинчи азондир. Пайғамбар алайҳиссалом вақтларида, Абу Бакр Сиддиқ билан Умар Форуқ даврларида жумага фақат бир марта азон айтилган. Ҳазрати Усмон халифа бўлганларидан сўнг шаҳар кенгайиб, одам кўпайганда, у киши бозордаги ўзларининг Завро номли ҳовлиларида ҳам бир марта азон айтишни ташкил қилганлар. Уни эшитиб, кишилар масжидга юзланганлар. Кейин имом минбарга чиққанда жуманинг ҳақиқий азони айтилган. Ушбу оятдаги ҳукмлар ҳам мана шу иккинчи азонга тааллуқлидир. «Эй, иймон келтирганлар! Жума кунида намозга нидо қилинган пайтда Аллоҳнинг зикрига шошилинг ва савдони қўйинг.» Худди шу оят билан икки ракъатли Жума намози мусулмонларга жамоат билан ўқиш учун фарз қилинди. Унинг вақти – пешин намозининг вақти. Яъни жума куни пешин ўрнига жамоат билан Жума намози ўқилади. Аллоҳнинг оятдаги: «Ва савдони қўйинг», деган фармонига асосан, жума куни иккинчи азондан бошлаб намоз ўқиб бўлгунча савдо-сотиқ ҳаром қилинган. Оятнинг охирида Аллоҳ таоло Жума намозида мусулмонлар учун катта фойдалар борлигига кафолат беряпти. «Агар билсангиз, бу ўзингиз учун яхшидир.» Ўша фойдалар қуйидагилар: 1. Жамоат намози вақтида мусулмонлар бир-бирлари билан танишадилар, ораларидаги фарқлар йўқолади. Давлат бошлиғи оддий фуқаро билан, бой камбағал билан, оқ танли қора танли билан бир сафда туриб, бошини ерга қўйиб сажда қилади, яъни жамоат намозида ўзаро тенглик ғояси ҳаётга татбиқ қилинади. 2. Озода кийинган, хушбўй атирлар сепган катта-кичик барчанинг бир сафда туриб, катта жамоат билан намоз ўқиши Исломнинг фазлини кўз-кўз қилади. Кишиларга ўз таъсирини ўтказади. 3. Жума намозида доимо хутба – ваъз, насиҳат бўлади. Кишилар яхшиликка даъват қилинади ва ёмонликдан қайтарилади. Умуман, мусулмонларга керакли барча мавзулар баёни бўлади. 4. Кўпнинг дуоси кўл, деганларидек, жума куни кўпчилик хайр-барака тилаб, дуолар қилади. Унинг устига, Аллоҳ таоло жума кунида дуолар қабул бўладиган соатни жойлаган. Пайғамбаримиз алайҳиссаломнинг кўпгина ҳадисларида жумага ғусл қилиб, ювиниб, хушбўй нарсаларни сепиб бориш тавсия қилинган. Жума намозини узрсиз қолдириш эса жуда катта гуноҳ ҳисобланади.  
Мавзуга оид мақолалар
«Иймон»нинг маъноси тасдиқ этмоқ, ишонмоқдир. Пайғамбаримиз Муҳаммад алайҳиссаломга Аллоҳ таоло томонидан етказилган барча нарсаларни дил билан тасдиқлаб, уларга тил билан иқрор бўлиш «иймон» дейилади.

00:10 / 02.05.2017 1629
Ривоят қилинишича «Абу Ҳанифа раҳматуллоҳи алайҳ Довуд Тоийга Нега ёлғизликни ихтиёр қилдинг деб сўради. Баҳсу жадални тарк этиш билан нафсимга қарши давоми...

00:02 / 23.01.2017 3022
Аллоҳ таоло Нисо сурасининг 58оятида қуйидагиларни айтади «Албатта, Аллоҳ сизларга омонатларни ўз аҳлига эриштиришни амр қилур». Макка мушриклари Расулуллоҳ давоми...

04:13 / 27.05.2019 730
Вақтни муҳофаза қилишда ёрдам берадиган сабаблар Динимиз вақтни муҳофаза қилишга, ундан унумли фойдаланишга буюрди. Ибн Аббос розияллоҳу анҳумодан ривоят давоми...

10:00 / 24.11.2019 891