Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

 Кўп гапирмаслик

Муслима қизлар учун кўп ҳолларда сукутдан кўра гўзалроқ ва яхшироқ нарса бўлмайди. Расулуллоҳ соллаллоҳу алайҳи васаллам айтадилар: “Ким Аллоҳга ва охират кунига иймон келтирган бўлса, яхши гап айтсин ёки сукут қилсин”. У зот яна бундай марҳамат қилганлар: “Бир банда Аллоҳ рози бўладиган гапни арзимас санаб гапиради-да, шу боис Аллоҳ унинг даражасини кўтаради. Бир банда Аллоҳ норози бўладиган гапни арзимас санаб гапиради-да, шу сабабли жаҳаннамга қулайди”.

Абу Дардо розияллоҳу анҳунинг насиҳатлари бундай эди: “Оғзингдан кўра икки қулоғингни кўпроқ ишлат, чунки Аллоҳ таоло кўпроқ тинглашинг учун қулоқни иккита, камроқ гапиришинг учун оғизни битта қилиб яратди”.

 Фузайл ибн Иёз роҳимаҳуллоҳ айтади: “Мўминнинг гапи кам, амали кўп, мунофиқнинг эса гапи кўп, амали оз бўлади”.

Доктор Ҳассон Шамсий Пошонинг  "Ёш қизга насиҳат" китобидан.