Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Агарда сиз стресс, тушкунликдан қутулмоқчи бўлсангиз, нафсингизга бир назар солишингиз керак. Бу каби ҳолатлардан қутулишингизга ёрдам берадиган баъзи тавсияларни тақдим қиламиз:

 Келажак борасида бeзовталанманг, ризқнинг камлигидан хавфсираманг. Зеро, ризқ Аллоҳнинг қўлида. “Осмонда эса сизларнинг ризқу рўзларингиз (яъни, Ерда мўл ҳосил бўлишига сабаб бўлгувчи ёмғир) ва сизларга ваъда қилинаётган нарса (яъни, жаннат) бордир”.

Ўтган ишларни ҳадеб ўйлайверманг, йўқотганларингизга ачинманг. Расулуллоҳ соллаллоҳу алайҳи васаллам: “Сенга бирор иш етса, “Агарда бунақа қилганимда, фалондақа бўларди”, демагин. Аксинча “Аллоҳ тақдирни битиб қўйган, Ўзи хоҳлагани бўлди”, дегин. Зеро, “агарда” калимаси шайтоннинг ишига йўл очади”, дея марҳамат қилганлар.

Аллоҳ таоло пешонага нимани битган бўлса ва нимани жорий қилса, ҳаммасига рози бўлинг. Мўмин одам ҳаёт синовларидан чўчимайди. Мўминнинг ҳамма иши яхшилик.  Расулуллоҳ алайҳиссалом шундай деганлар: “Мўминнинг иши ажиб. Унинг ҳамма иши ўзи учун хайрдир. Бунақаси фақат мўмин учундир. Унга хурсандчилик етса, шукр қилади, бу унга хайр бўлади. Агар бошига ёмон иш тушса, сабр қилади ва бу ҳам у учун яхшилик бўлади”.

Бошингизга тушган ғам-ташвишларнинг саноғи билан қизиқиш ўрнига Аллоҳ таолонинг неъматларини сананг. Зеро, Аллоҳ таоло Иброҳим сурасининг 34-оятида: “Агар Аллоҳнинг неъматларини санасангизлар, саноғига етолмайсизлар” , дея марҳамат қилади.

Бошқаларга ҳам эътиборли бўлинг, худбин бўлманг! Ҳар куни бирор бир инсоннинг табассумига сабаб бўладиган яхшилик қилинг.

 Доктор Ҳассон Шамсий Пошонинг "Жаннат бўстонларидаги оилавий оқшомлар" китобидан