Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Шу йилнинг 21 ноябрь санасида “Пешқадамлар карвони” лойиҳасининг биринчи банди аъзолигига номзодлар билан учрашув бўлиб ўтди. Маълумки, лойиҳанинг биринчи банди кутубхоналар ташкил этиш ва уларни китоблар билан таъминлаш фаолиятига қаратилган.

Учрашув иштирокчилари ўзлари фаолият олиб бораётган муассаса ва хонадонларидаги кутубхоналар ҳақида маълумотлар алмашдилар ва лойиҳа таъсисчилари томонидан уларга кейинги фаолиятлари учун режа ва тавсиялар тақдим этилди. Улардан Мисрда лойиҳанинг 4 та банди бўйича фаолият олиб бораётган Шоҳруҳ қори Ҳақбердиев ҳамда наманганлик китоб тарғиботчиси Азиза Қурбонова билан ҳамкорлик шартномалари имзоланди.

Кеча 25 ноябрь санасида эса, лойиҳанинг иккинчи банди бўйича аъзоликка номзодлар билан учрашув ташкил этилди. Унда ижтимоий тармоқларда китоб ўқиш билан боғлиқ қизиқарли маълумотларни, хусусан, ҳазратимизнинг илмий меросларини мунтазам улашиб бораётган 6 нафар аёл-қизларимиз таҳририятимизга ташриф буюриб, ўзларининг фаолиятлари билан таништирдилар. Кейинги фаолиятларида ҳам иккинчи бандда кўзда тутилган мақсадларга кўра ҳамкорлик қилиш бўйича лойиҳа таъсисчиси Одинахон Муҳаммад Содиқ томонидан кўрсатмалар берилди. Кўрсатмага мувофиқ, келаётган январь ва февраль ойларида китоб ўқиш кўникмасига доир 8 та дарсдан иборат курс олиб борилади, бунда лойиҳанинг айнан шу йўналиши аъзолари суҳбатлар уюштирадилар.