Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Оиша розияллоҳу анҳодан ривоят қилинади:
«Мен Набий соллаллоҳу алайҳи васалламнинг ҳузурларига бориб:
«Ё Аллоҳнинг Расули! Аёлларингизга куня бердингиз, менга ҳам куня беринг», дедим.
«Опангнинг ўғли Абдуллоҳ билан кунялан», дедилар».
Шарҳ: Оиша онамиз розияллоҳу анҳунинг кунялари Умму Абдуллоҳ бўлган. Бундан қариндошларнинг болалари исми ила куняланиш мумкинлиги чиқади.
Оиша розияллоҳу анҳодан ривоят қилинади:
«Оиша розияллоҳу анҳо:
«Ё Аллоҳнинг Набийси! Менга куня бермайсизми?» деди.
«Ўғлингнинг кунясини ол», дедилар. Яъни Абдуллоҳ ибн Зубайрни. Бас, у киши «Умму Абдуллоҳ дея куняланар эди».
Шарҳ: Бу ҳадисдан маълум бўлишича, Расулуллоҳ соллаллоҳу алайҳи васаллам Оиша онамиз розияллоҳу анҳога опалари – ҳазрати Асмо бинти Абу Бакрнинг ҳамда Зубайр ибн Аввом розияллоҳу анҳунинг ўғиллари – Абдуллоҳ ибн Зубайр розияллоҳу анҳунинг исмлари билан куня берган эканлар.
Маълумки, Оиша онамиз розияллоҳу анҳонинг ўз фарзандлари бўлмаган. Бундай пайтда опа-сингил ёки бошқа қариндошларнинг болалари исми билан куняланса бўлар экан.
