Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Инсон Аллоҳ таолога ибодат қилиб, Рамазон рўзасини тутар экан, тақво зинапояларидан кўтарилаверади. Лекин рўза тутган бўлса ҳам, ғийбат қилган, ёлғон гапирган, қалбларни ранжитган инсон Рамазон ойини ҳурмат қилмаган бўлади.

Фараз қилинг, иссиқ кунларда хонада кондиционерни ёқдингиз. Эшик, деразаларни очиб қўйдингиз. Совуқлик ташқарига чиқиб кетади. Номи «кондиционер ёқилди», лекин хонани совутмайди.

Шунингдек, рўзадор инсон рўзаси туфайли емоқ, ичмоқдан тийилса-да, Аллоҳ қайтарган гуноҳ ишлардан тийилмаса, унда тақво ҳосил бўлмайди. Номи «рўзадор», лекин рўзаси руҳиятни покламайди, тақвога зинапоя бўла олмайди...