Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳаётнинг азалий қонуни шудир,
Шу ҳақда тинмайин сўзлайверамиз —
Ёмонлар вақт ўтиб унутилади…
Яхши одамларни эслайверамиз!
Юракка ўтириб қолган айрилиқ,
Ўша манзилларни излайверамиз.
Шукрки, ҳеч кимдан кутмаймиз буйруқ,
Яхши одамларни эслайверамиз!
Нетамиз, дуолар ёғдирамиз-да,
Уларнинг ёдини кўзлайверамиз.
Кўзлари, сўзлари — хотирамизда…
Яхши одамларни эслайверамиз!
Бу не шараф эрур, бу не саодат,
Феълларни ўтмишда туслайверамиз.
Эскилардан бизга юққан шу одат:
Яхши одамларни эслайверамиз!
Аллоҳга осон иш исм танитмоқ,
Биз гарчи дунёни ўзлайверамиз.
Гуноҳдек туюлар ҳатто унутмоқ —
Яхши одамларни эслайверамиз!!!
Хайрулла Ҳамидов
