Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Фотима розияллоҳу анҳо Расулуллоҳ соллаллоҳу алайҳи васалламдан кейин олти ойгина яшади.
Имом Заҳабий роҳимаҳуллоҳ буни шундай шарҳлайди:
“Фотима розияллоҳу анҳо Набий соллаллоҳу алайҳи васалламнинг вафотларидан кейин олти ой мобайнида эриб, қайғудан тилка-пора бўлиб борди!”.
“Эриб” деган сўзга эътибор беринг. Араблар: “Яқинларни йўқотиш ғурбатдир!” дейишган. Яқинини йўқотган киши ўзининг бир парчасини кесиб олишгандек ҳис қилади ўзини. Бу кесилиш руҳдаги кесилишдир!
Баъзиларнинг ўрнини ҳеч ким тўлдира олмайди. Яъқуб алайҳиссаломнинг ўн бир ўғли бор эди. Аммо Юсуф алайҳиссаломнинг ўрнини уларнинг ҳеч бири тўлдира олмади!
Расулуллоҳ соллаллоҳу алайҳи васаллам ўн бир аёлга уйланганлар. Аммо у зот соллаллоҳу алайҳи васаллам: “Аллоҳ менга Ҳадичанинг ўрнига ҳеч кимни бермади!” деганлар.
Яқинларини йўқотганларга Аллоҳ сабр берсин!
Абдулқодир Полвонов
