Жорий йилнинг 20 октябрида «islom.uz» портали ўзининг 10 йиллигини нишонлади. Байрам тантанасини фазилатли Шайх Муҳаммад Содиқ Муҳаммад Юсуф ҳазратлари очдилар. Байрамда порталдаги барча сайтлар қатнашдилар. Ҳар бир сайт ўзининг шаклланиш ва ривожланиш тарихи ҳақида нутқ сўзлади ва келажакдаги режалари ҳақида баён қилдилар. Айниқса,« muslimaat.uz» сайти ўзининг видео роликли табриги билан байрамга ўзгача шукуҳ бағишлади. Роликда «muslimaat.uz» сайтининг тарихи, сайтдаги бўлимлар, улардаги мақолалар, сайтнинг форуми ва фейсбукдаги саҳифаси ва ҳоказолар ҳақида ёритиб берилган. Видео ролик йиғилганларда яхши таассурот қолдирди.

Барча сайтлар ўз чиқишларини тугатганларидан сўнг Ҳусайнхон Яҳё Абдулмажид сўз олиб, Islom.uz порталининг 10 йиллигига бағишлаб ёзган «Ўн ёшинг муборак!» шеърини ўқиб бердилар (http://muslimaat.uz/kutubxona/adabiyotlar/item/1514-o-n-yoshing-muborak#.Umjm3vlSiC9). Сўнгра «Islom.uz» порталининг 10 йиллигига бағишлаб эълон қилинган танлов натижаларига кўра «islom.uz» порталига атаб ёзилган мухаммас муаллифи Ҳамидуллоҳ Беруний олий ўрин соҳиби деб топилди ва эсдалик совғаси билан тақдирланди. Шайх ҳазратлари қолган иштирокчиларнинг барчаларини биринчи ўрин соҳиблари деб эълон қилдилар. Байрам якунида «muslimaat.uz» сайти «islom.uz» портали асосчилари ҳисобланган Шайх Муҳаммад Содиқ Муҳаммад Юсуф ҳазратларига, Исмоил Муҳаммад Юсуфга ва Абу Муслимга шеърий табрикларини ва эсдалик совғаларини тақдим қилдилар (http://muslimaat.uz/bosh-sahifa/video/item/1518-tabriklar#.UmjsfflSiC8). Тадбирни фазилатли Шайх Муҳаммад Содиқ Муҳаммад Юсуф ҳазратлари порталнинг, унинг ходимларининг ва мухлисларининг ҳақларига хайрли дуолар қилиб якунладилар.