На хуш тотлиғ Ҳақ ёди…

0 820

На хуш тотлиғ Ҳақ ёди, саҳар вақти бўлғонда,
Болдин сучук ҳавони, саҳар вақти бўлғонда.

Бўлса кўнгилда хатар, қилур санга ҳақ назар,
Тавба қилғил бехабар, саҳар вақти бўлғонда.

Умринг ўтти йўқ ҳосил, нега ётурсан ғофил,
Агар мардсан бўл ҳозир, саҳар вақти бўлғонда.

Ошиқ саҳар турорлар, тани жон қилурлар,
Ишқ ўтиға куёрлар, саҳар вақти бўлғонда.

Саҳар вақтидир соат, турғонға бўлғай роҳат.
Очлур давлат-саодат, саҳар вақти бўлғонда.

Ҳардам куяр бу жоним, қуллиқсиз йўқ дармоним,
Ҳақ зикридир дармоним саҳар вақти бўлғонда.

Ҳақ ким тилоса дийдор, ошиқ бўлуб юрар зор.
Ёдин айтуюр бедор, саҳар вақти бўлғонда.

Қул Сулаймон соати, заррача йўқ тоати,
Зикри жоннинг роҳати, саҳар вақти бўлғонда.

Сулаймон Боқирғоний

Баҳам кўринг

Comments are closed.