Кирсам майлими?
Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Қадрли болажонлар, бугун сиз билан бировнинг уйига ёки хонасига кириш учун рухсат сўрашни ўрганамиз. Сиз кимнингдир хонадонига борганда кириш учун аввало уй эгасини чақириш кераклигини биласиз. Эшик очиқ бўлса ҳам, ичкаридан уй эгасини чақирмасдан кириб кетиш мумкин эмас. Буни биласиз-а? Ҳа, яхши, барокаллоҳ! Бировнинг уйига чақирмасдан кириш у ёқда турсин, ҳатто кўз ташлаш, “Ичкарида ким бор экан?” деб қараб қўйиш ҳам мумкин эмас. Шунинг учун эшикни тақиллатиш ёки «Ичкарига кирсам майлими?» дея уй эгасини чақириш керак бўлади.

Демак, эшик ёпиқ бўлса ҳам, очиқ бўлса ҳам, ичкарига қарамасдан эшикнинг рўпарасида эмас, балки унинг ўнг ёки чап томонида туриб, эшик қўнғироғини босасиз ёки эшикни уй эгалари эшитадиган даражада тақиллатасиз. Жуда қаттиқ тақиллатиб, уларни чўчитиб юбормайсиз. Лекин жуда секин тақиллатсангиз ҳам, ичкаридагилар эшитмаслиги мумкин. Истасангиз, эшикни тақиллатмай, баландроқ овозда керакли кишини чақиришингиз мумкин. Қўнғироқни чалиб, эшикни тақиллатиб ёки овоз чиқариб чақириш уч марта бўлади, ундан кўп чақириш одобсизлик ҳисобланади. Ҳар бир чақиришнинг орасида бироз кутиб турасиз. Ичкаридан биров «Ким?» деб сўраса, исмингизни айтиб, ўзингизни таништирасиз. Мабодо, киришга рухсат бўлмаса, масалан, «Уйда ҳеч ким йўқ эди» каби гаплар айтилса ёки уч марта чақирганингизда ҳам жавоб бўлмаса, индамай қайтиб кетишингиз керак, ҳатто эшик очиқ бўлса ҳам, кириб кўришингиз мумкин эмас.

Худди шунингдек, ўз уйингизда ҳам ота-онангиз ёки опа-укаларингиз ўтирган ёки ётган хонага рухсатсиз кириш керак эмас. Бунда ҳам, ҳозир айтилганидек, ё эшикни тақиллатасиз, ё овоз чиқариб чақирасиз. Рухсат берилсагина, кирасиз.

Болажонлар, бирор жойга кириш учун рухсат сўраш нега бунча муҳим экан, деб ўйлаяпсизми? Масалан, мактабда бирор синфхонага рухсат сўрамай кирсангиз, дарсга халақит қилишингиз мумкин. Ёки бировнинг хонадонига ё ўз уйингизда кимнингдир хонасига рухсат сўрамай кирсангиз, у ердагилар кийим алмаштираётган бўлиши ёхуд ухлаш учун ётган бўлиши, ё бўлмаса, бошқа турли ҳолатларда турган бўлиши мумкин. Шунда ноқулай вазият юзага келади. Мана шундай нохуш ёки хижолатли ҳолатларнинг олдини олиш учун рухсат сўраб кириш керак.

Яна бир гап – рухсат сўрасангиз ҳам, бировнинг уйига ёки хонасига истаган вақтингизда бораверманг. Масалан, намоз вақтида, овқатланиш вақтида ё кеч бўлиб, уйқуга ётиш вақти бўлганда бормаган маъқул.

Ғиёсиддин Юсуф

Мавзуга оид мақолалар
«Қуръон ўқинглар, зеро у қиёмат куни ўз соҳибига шафоатчи бўлади». Муслим ривояти 2012 йил 19 сентябрь куни Ўзбекистон мусулмонлари идораси ташаббуси билан давоми...

08:52 / 30.11.2016 1429
Икки киши саёҳат қилиб юриб, бир ғорга дуч келибди. Ичига кириб қарашса, кумуш эшик бор экан. Эшикни очиб, ичкарига киришибди. У ерда бир кумуш сандиқ бўлиб, ичи тўла давоми...

05:20 / 28.12.2016 1811
Рамазоннинг ҳаётимга таъсири Бисмиллаҳир роҳманир роҳийм. Азиз муслим ва муслима биродарларимиз Барчангизни муборак Рамазон ойи билан қутлайман. Яна бир бор давоми...

03:53 / 07.03.2017 2039
1. Тирсакларини икки ёнидан йироқ қилиш. 2. Рукуъ ва саждага такбир айтиш. 3. Рукуъ ва саждада тасбеҳ айтиш. 4. Рукуъ ҳолида икки тиззани қўл билан ушлаб туриш. 5. Эр давоми...

07:14 / 09.12.2016 1478