Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Янги топилган ХV асрга тааллуқли бўлган ўрта аср ирланд қўлёзмаси Ирландия билан мусулмон олами ўртасидаги ажойиб алоқадорликни намоён қилди, дея маълум қилди Irish News 5 март куни.
«Биз Ирландиядаги ўрта аср европалик шифокорлар 1400 йилларда мусулмон шифокорлари ва биологларининг билимларига таянганларини кашф қилдик», дейди Корк университети коллежининг ирланд бўлими профессори Падрайг Мачейн.
Ҳаммаси Мачейннинг Британия оролларидаги Корнуолл кельт вилоятида яшайдиган оилага тегишли бўлгани китоб ҳақида хабар топганидан бошланди. Китоб эгалари тақдим қилган суратга биноан Мачейн ундаги ирланд матнларининг тиббиётга доир эканини аниқлади. Бу Ибн Синонинг машҳур «Тиб қонунлари» тиббий энциклопедиясининг ирланд тилига таржимасидан парчалар бўлиб, у ўша пайтда Европада катта шуҳрат қозонган. Ушбу китоб парчаси Ирландияда ўрта асрларда ёш европалик шифокорларни етиштиришда фойдаланилгани маълум бўлди.
