Рўза ва ёлғон гапириш
Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Абу Ҳурайра розияллоҳу анҳудан ривоят қилинади. Набий соллаллоҳу алайҳи васаллам: «Ким ёлғон гапиришни ва унга амал қилишни қўймаса, унинг таоми ва шаробини тарк қилишига Аллоҳнинг эҳтиёжи йўқ», дедилар (Бешовларидан фақат Муслим ривоят қилмаган).

Ислом дини ва таълимоти бўйича мусулмон инсон тилини доимо ёмон сўзлардан, беҳуда гаплардан тиймоғи лозим. Рўзадор мусулмон учун эса бу таъкид яна ҳам кучли бўлади. Ушбу ҳадисдаги «ёлғон гапириш»га ғийбатчилик, чақимчилик, иғво, бўҳтон ва бошқа турдаги барча тил офатлари киради. Араб масалларининг бирида айтилганидек: «Кишининг ўлими унинг икки тиш суяги ўртасида (яъни, тилида)дир». Шунингдек, «унга (ёлғонга) амал қилиш» деганда Аллоҳ таоло ва Унинг Расули қайтарган, шариат таълимотларига хилоф бўлган ҳар бир ишни қилиш тушунилади.

Қуръони Каримда «Роҳманнинг суюкли бандалари» дея мадҳ қилинган бандаларнинг гўзал сифатларидан бири уларнинг ботил ва ёлғон нарсаларга гувоҳ бўлмасликларидир. Аллоҳ таоло айтади: «Улар ёлғон гувоҳлик бермайдиганлардир ва беҳуда нарсалар олдидан ўтсалар, ҳурматларини сақлаган ҳолда ўтарлар» (Фурқон сураси, 72-оят).

Роҳманнинг суюкли бандалари ёлғон ва ботил бор жойда ҳозир бўлмайдилар ҳамда унга гувоҳ бўлмайдилар. Модомики, улар ботил нарсага гувоҳ бўлмас эканлар, ўзлари уни умуман гапирмасликлари, қилмасликлари аниқдир.

Юқоридаги ҳадиси шарифда таъкидланганидек, Аллоҳ таолони рози қиладиган амалларни қўйиб, ботил сўз ва амалларга берилиб кетган кишиларнинг оч қолишлари, чанқашларига Аллоҳнинг эҳтиёжи йўқ. Улар қилган ибодатлари билан Аллоҳнинг розилигини ололмайдилар, Унинг севгисини қозонолмайдилар. Савобдан маҳрум бўладилар. Улар амаллар қабул қилиниши учун лозим бўлган қоидаларни буздилар. Зотан, ўзини таом ва шаробдан тийиб туриб, ёлғон, иғво, чақимчилик, ғийбат, бўҳтон сўзларни гапираверишдан, ношаръий ишларни қилаверишдан нима фойда бор?

Шубҳасиз, ушбу ҳадис мусулмонлар учун Аллоҳ таолонинг амрига бўйсуниб, қайтарган нарсаларидан тийилган ҳолда Унинг Ўзигагина холис ибодат қилишларида йўлланмадир. Шояд, улар шу орқали илоҳий ризоликка эга бўлсалар ва тутган рўзалари қабул, ажру савоблари зиёда бўлса!

Умму Билол

Мавзуга оид мақолалар
Грузия бош вазири Батумида масжид қурилиши борасида ҳеч қандай муаммоларни кўрмайди, деб хабар беради Тренд. «Мусулмонларга масжид керак бўлган ҳолда, нега энди давоми...

08:01 / 21.12.2016 1310
Қиёматдан олдин зоҳир бўладиган кичик аломатлар ҳақида кўплаб ҳадиси шарифлар келган. Улардан кўпини «Ҳадис ва Ҳаёт» китобининг «Фитналар ва қиёмат аломатлари давоми...

01:22 / 17.11.2016 3216
Аллоҳ таоло муборак каломида айтади  ٩٧   «Унда очиқ аломатлар ва мақоми Иброҳим бор. Ким унга кирса, тинч бўладир. Одамлардан йўлини давоми...

09:51 / 11.03.2017 2879