Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Солимдан, у отасидан ривоят қилинади: «Набий соллаллоҳу алайҳи васаллам: «Ухлаётган пайтингизда уйингизда оловни қолдирманг», дедилар». Шарҳ: Акс ҳолда ёнғин чиқиши, инсон мол-мулкидан ва ҳатто жонидан ҳам ажралиб қолиши мумкин.

Ибн Умар розияллоҳу анҳудан ривоят қилинади: «Умар розияллоҳу анҳу: «Олов душмандир, ундан ҳазир бўлинг», деди». Шарҳ: Ҳар доим ётишдан аввал аҳли-аёллари ётадиган жойлардаги ёниб турган оловларни ўчириб, сўнг ухланг. Бошқа пайтларда ҳам оловга эҳтиёт бўлинг.

Ибн Умар розияллоҳу анҳудан ривоят қилинади: «Расулуллоҳ соллаллоҳу алайҳи васаллам: «Уйларингизда оловни қолдирманглар. У душмандир», дедилар». Шарҳ: Албатта, бу ерда оловни қаровчиз қолдирмаслик ҳақида сўз бормоқда.

Абу Мусо розияллоҳу анҳудан ривоят қилинади: «Мадинада бир уй кечаси аҳли ичида эканида ёнди. Бу ҳақда Набий соллаллоҳу алайҳи васалламга айтилди. Шундау Зот: «Албатта, олов сизга душмандир. Қачон ухласангиз, уни ўчиринг», дедилар». Шарҳ: Бундай ҳодисалар, минг афсуски, ҳозир ҳам бўлиб туради. Бунинг асосий сабаби, Расулуллоҳ соллаллоҳу алайҳи васалламнинг бу борадаги тавсияларига амал қилмасликдир.