Аёллларга илм тарбия ўргатиш
Аёлларнинг илм ўрганишлари, билимли бўлишлари яхшими ёки бўлмаса юрт тутиш тўғрисида лозим бўлган, уни қилмай қолиши ҳеч мумкин бўлмаган бир неча хизматларни ўрганишдан бошқа маълумотлари бўлмаганими? Қандай ажиб савол, аёлларни хўрлаш учун берилганини сўзлаб, унга қарши ушбу равишда жавоб берамиз. Ёш бир қиз тўғри мустаҳкам, кенг ҳатто ёш муосид (қулай) бўлса, тўлиқ бир равишда таълим тарбия кўрсин, ақлнинг қувватини-ю зеҳнини кенгайтириш тўғрисида ундан ҳеч бир нарса қизғанилмасин. Одамлар ер каби ўз ҳолига ташланса, ўт-ўландан бошқа бир нарса бўлдира олмаслар. Эрлар каби аёллар ҳам англамоқ, билмоқ учун ақл, тузук қилмоқ учун бир фикру ният, қарши турмоқ ёки бардош бермоқ учун ирода ва эзгулик эгаларидир.
Шундай бўлгач, ҳеч нарса ўрганмай ишларнинг ҳаммасини қилмоқлари ўзлари учун осон бўларми? Аёллар қиладиган ишларнинг ҳар бири бутун одамлар умрининг негизидир. Ҳақиқатда ҳам юртларни хароб этган ёки яхши тутган, юрт нарсаларининг ҳар бирини ўрнига қўйган, уй ичида бўлган жамоаларга алоқадор ишларнинг ҳар бирини ўрнида юритган аёллар эмасми? Шундай экан, илм ўрганган, тарбия кўрган бир қизнинг ўз ишларини яхши ва ўрнида бажара олишига ишониш керакдир. Юрт жамоаларининг яхши тарбия қилинши, саломатлиги ва оналикнинг, завжаликнинг адо қилиниши, юрт ишларининг кўркам суратда юритиши учун қизларга мустаҳкам ва тўғри бир равишда илму тарбия ўргатиш лозимдир. Энди аёл-қизларга айтамиз: тиришингиз, вақтни ўтказмай, ақлу-зеҳнингизни ўткир қилингиз, қайсики икки шарт биландир. Биринчиси:ўқув ва билимингиз бутун устингизда бўлган ишларнинг биринчи даражалиси қизлик, аёллик, ёш оналик каби ишларингиз ҳеч бир камчилик келтирмасин. Иккинчиси шудирки, билган нарсаларингиз учун ҳеч бир вақт мағрур бўлмангиз ва уни ҳамон ўрганишга тиришингиз. Бу икки шартни ўрнига қўя олсангиз, илму камол эгалари бўларсиз ва бунинг учун ҳеч ким сизни айб этмас. Аёлларга тегишли ҳар бир фазилатга эга бўлган, яқиндагина куёвга чиққан бир ёш аёлнинг эр завжаси қайин-инисига мактабда ўқитувчилар тарафидан берилган араб-форсий вазифаларини тузутганини кўргач, ажабланиб: “Субҳону-л-лоҳ! Сиз икки тилни биласизми?”-деб сўрагач, хоним кулимсираб: “Ҳа”, деб жавоб бергандир. Қандай ибратли сабоқ.....
