Одамлар нима учун рўза тутмайдилар?

0 2 392

– Рамазон ойи муборак бўлсин! Аллоҳ тутаётган рўзаларингизни қабул қилсин.

– Ие, ҳозир рўза ойими. Сиз рўза тутдингизми?

— Ҳа, Аллоҳ қабул қилсин. Сиз тутмадингизми?

– Ҳа энди, мен тутолмайман…

Ҳар йили Рамазон ойи кириб келганида аҳли мусулмон хурсандчилик ила бу муборак ойни кутиб олади, шу кунларга етказган Аллоҳга ҳамд айтиб, бу ойдан, унинг фазилатидан унумли фойдаланиб қолишга ҳаракат қилади. Ахир рўзадорнинг дуосини фақат Аллоҳнинг Ўзи ижобат қилади-да, унинг устига қилган хайрли амалларига кўпайтириб ажр-савоблар беради, қилган гуноҳлари учун тавбасини қабул қилиб, уни мағфират қилади…

Аммо баъзи инсонлар ҳам борки, улар бундай имкониятдан юз ўгирадилар, Рамазон ойи фазилатларининг қадрига етмайдилар, минг ойдан яхшироқ бўлган тунда бедор бўлмайдилар, кўплаб неъматларни ато этган Аллоҳ розилиги учун таомланишдан воз кечмайдилар… Хўш, нима учун одамлар рўза тутмайдилар?

Биринчи баҳона: Мен рўза тутолмайман, чунки ўзим ориққинаман, рўза тутсам баттар озиб кетаман.

Иккинчи баҳона: Мен рўза тутгим келади, аммо саҳар вақти бунчалик эрта туролмайман.

Учинчи баҳона: Ойимлар менга, «Ҳали ёшсан, бувингнинг ёшларига кирсанг бемалол тутаверасан» дейдилар.

Тўртинчи баҳона: Мен ҳамма нарсага, ҳатто очликка ҳам чидай оламан, аммо чанқоққа, ташналикка чидай олмайман. Бундай жазирамада рўза тутиш қийин.

Бешинчи баҳона: Қонимнинг таркибида ўзгариш бўлибди, шунга диета қилишим шарт экан.

Олтинчи баҳона: Ўзи яқиндагина медосмотр – тиббий текширувдан ўтдим. Ошқозонимда яллиғланиш бошланибди. Нотўғри овқатланаётган эканман. Энди эса парҳез қилмасам бўлмас экан.

Еттинчи баҳона: Мен кун бўйи кўчада тижорат, тирикчилик билан юраман. Югур-югур ишларим кўп. Рўза тутсам мазам қочиб қолиши аниқ.

Саккизинчи баҳона: Кўп йиллардан бери сигарета чекаман, рўза тутсам ҳам очликка, ҳам чекмасликка чидолмайман. Малол келади…

Бу «баҳоналар»га раддия ўрнида турли хил ҳаётий, диний, тиббий, илмий далиллар келтириш мумкин. Сизнинг далилингиз қандай?

Баҳам кўринг

Leave A Reply