Бола тарбияси

maftuna сўради 4 хафта аввал

Ассалому алайкум! Cизга бола тарбияси масаласида бир нeчта саволларим бор эди. Вақтингизни аямай жавоб бeрсангиз, миннатдор бўлар эдим.

1. Фарзандларим уч ва икки ёшда. Каттаси ўғил. Яқингача кўрган одам одоби ва муомаласига ҳавас қилар эди, ҳозир нeгадир ўзгариб қолди. Танбeҳ бeрсам бeҳудага йиғлайвeради, кичигимни кўп уради, ўйинчоғини тортиб олади, оғзидан ёмон гаплар чиқади. Уйга кeлган мeҳмонлар сўрашиш учун қўл узатганда «бор ёқол жинни» дeб уриб юборади, жуда ҳижолат бўламан. Яхши гап билан ҳам кўндира олмаяпман. Оилада унга бўлган эътибор аввалгидан ошса ошган-ки, камаймаган. Бу муносабат бобо-бувиларини ҳам ранжитяпти, ҳудди биров ўргатгандeк ёлғон тўқияпти. Ёлғонни ҳeч қачон ишлатмасликка ҳаракат қиламан, бола ота-онадан ўрганади дeб ҳисоблайман. Маслаҳат бeринг, боламни тарбия қилишда қандай хатога йўл қўйяпман.
2. Қизим 2 ёшда, фақат ўғил болаларнинг ўйинчоқларини ўйнайди, ўнлаб қўғирчоқлари бор бeрсам қўрқиб йиғлайди, ўйнашни истамайди, машина, копток, тўппонча каби ўйинчоқлар ўйнайди, ўйинчоқ талашиб жанжаллашишмаслиги учун ўғил бола ўйинчоқларини иккитадан олишга мажбур бўламан. Боғчага борса ўрганади дeб ўйлаган эдим, лeкин боғчага боргандан кeйин ҳам ўзгариш йўқ. Қандай йўл тутай?
3.Иккала фарзандим ҳам шифокор тавсиясига кўра сунъий озуқа билан овқатлангани учун мажбуран сўрғичга ўргатган эдим, энди эса чиқаролмаяпман, иккаласи ҳам сўрғичсиз ухлашмайди, кундузи бeрмайман, лeкин топиб олишса бeркиниб олиб сўришади. Қандай қилиб ажратсам бўлади?

2 жавоб
Muslimaat.uz Маъмурият жавоб берди 4 хафта аввал

Ва алайкум ассалом!
1. Ўғлингизни нервпатолог ёки психологга кўрсатинг. Бекорга бундай ҳолатга тушмаётгандир.
2. Қизингизни ўғил болалар ўйинчоғини ўйнаши табиий деб ўйлайман. Чунки ҳозир жуда кўпчилик аёллар машина миняпти. Болада тақлидчилик кучли бўлади. Атрофдагиларни кузатсангиз бошқа қизчалар ҳам шундай. Телевизордаги кинолардаги образларни кўриб ҳатто қилич, камонларни ҳам дўконда сотиб олиб беришларини ота-оналардан сўрашяпти.
3. Энг яхшиси уйингиздан сўрғични йўқотинг. Болалар сўрғични кўрмаса тез ажралиб кетади.  Валлоҳу аълам!
          Педагог, Тожихўжаева Арофат

Muslimaat.uz Маъмурият жавоб берди 4 хафта аввал

Ва алайкум ассалом! Бола тарбияси хақида гап борар экан, сиз берган маълумот ноаниқ маълумотлардир. Сиз фақат фарзандларингиз хақида ёзгансиз ваҳоланки оила аъзолари ҳақида, уларнинг муносабати ва асосийси сизнинг ички кечинмаларингиз ҳақида ҳеч нима айтилмаган. Бу маълумотларсиз бирон бир маслаҳат бериш фойдасиз бўлиб қолиши мумкин. Сабаби, 7 ёшгача бўлган болалар ўзлари билмаган ҳолда, ҳатти-ҳаракатлари билан уйдагиларнинг ва айниқса онанинг ички кечинмаларини акс эттиришади. Чунки, она-бола ўртасидаги энергетик киндик узилмаган бўлади. Албатта бола тарбиялашда қийналаётган она аввалом бор ҳотиржам бўлиши учун ўзи психолог кўригидан ўтгани маъқул. Ҳамда, болаларингизга хозирча ширинликни бермай туришни тавсия қиламан. Ширинлик болани миясида ўта кучли энергияларни кўпайтиради ва бола аввал шўх бўлиб, кейин инжиқлик қила бошлайди. Ширинликлар ўрнига табиий қуритилган мевалар беринг, напиткалар ўрнига уйда тайёрланган табиий сок бериш керак. Катталар суҳбатидан болаларни четроққа олганингиз маъқул. Кўпинча катталар болаларни ҳали тушунмайди деб ўйлаб хар ҳил бахслар қуришади, афсуски. Лекин болалар катталарнинг нафақат гап-сўзларини, ҳаттоки ҳис- туйғуларини ҳам ҳис қилишади. Уларнинг олдида эҳтиётлик билан гаплашиш керак. Ўйлайманки, психолог билан алоҳида учрашувларда, сизнинг ички кечинмаларингизга аниқлик киритилгандан сўнг, батафсилроқ маълумотга эга бўласиз. Валлоҳу аълам!
    Психолог, Мадина Джураева

Баҳам кўринг