Дезинформациядан огоҳ бўлинг!

3 8 532

Бисмиллаҳир Роҳманир Роҳим!

Устозимиз Шайх Муҳаммад Содиқ Муҳаммад Юсуф ҳазратлари вафотларидан сўнг ижтимоий тармоқлар марҳумнинг забардаст шахсияти, фазилатли хислатлари, илмий мероси мавзулари билан қайнади. Илиқ хотиралар, сокин кечинмалар, у зот билан қурилган ўзаро суҳбатлар ила тўлқинланди. Мусулмонларнинг қалбларидаги дил изҳорларидан кўзлар намланди. Ҳазратимизнинг биз билмаган кўплаб қирралари ҳам бизга намоён бўлди..

«Дўстдан кўра душман кўп», деган гап бекор экани сезилди.

Душмандан кўра дўст кўп экани билинди!

Алҳамдулиллаҳ!

Лекин «душманнинг ози ҳам кўп», деганларидек олимнинг ортидан орчиқча гап қотганлар ҳам бўлди! Ичидаги ҳасадини яширишга уриниб ҳам ўтирмаганлар учради.

Нима ҳам дердик, карвон бор экан ҳурадиган итлар ҳам бўлади… Биз устозимизнинг ўгит ва васиятларига кўра бу каби пасткашларга эътибор қаратмасликка, имкон қадар илмий савиядан пастламасликка қарор қилгандик ва ўша ювиндихўрларни ўз товоқлари олдида тарк этдик! Ит ҳурар карвон ўтар! Биз карвонга қўшилайлик, итларни ўз ҳолига қўяйлик..

Аммо…

Дўстлар ҳақида ҳам икки оғиз сўз…

Ҳодисадан сўнг дўстларнинг ихлоси, муҳаббати ва ҳис ҳаяжони жўшиб, кўп нарсаларни ёза бошлашди. Мени эса ўша ёзаётган нарсаларининг аслини суриштирмаётганлари ташвишга солди, бу мулоҳазаларни қоралашимга айнан шулар туртки бўлди…

Тўғри, ҳақиқатга яқин гаплар кўп, аммо ҳиссиёт ғалаёни билан миш мишлар гирдоби ҳам чайқалиб ётибди. Гўё бу борада мусобақа кетаётгандек, ҳар ким бошқаларни қойил қолдиришга уринаётгандек, гўё…

Ахир…

Ахир ҳар қандай инсонни ўз мақомида эслаш кифоя эмасми?!

Ахир бир кишини фазилатли кўрсатиш учун тўқилган гапларни айтиш шартми..?!

Ахир асоссиз мақтовлар ўша кишига нисбатан беҳурматлик эмасми..!?

Ахир Ийсо алайҳис саломни яҳудийлар зинодан туғилган, дея ҳақорат қилишган бўлса, насоролар «Аллоҳнинг ўғли», дейиш билан мақтамоқчи бўлиб ҳақорат қилишмаганмиди..!?

Ахир Аллоҳ таоло Расулуллоҳ соллаллоҳу алайҳи васалламни таърифлаганида, у зотга энг буюк мақомларни берганида «банда» деб, «қул» дея эсламаганмиди..!?

Ҳа, энг буюк мақом Аллоҳга бўлган қулликдир…!

Бори ҳам шу…

Борини айтиш кифоя!

Бўрттириш, кўпиртириш, йўқ нарсаларни бор қилиб кўрсатишга уриниш керакмас, такаллуфга ҳожати йўқ..!

Ахир…

Айрим мисолларни эслаб, уларнинг асоссиз миш мишлигини кўрсатиб ўтсам, зора ўзимизга келсак…

Зора…

1. Нимаймиш, шайх ҳазратлари вафот топганлари муносабати билан Мадина Мунавварадаги яшил гумбаз қизариб кетганмиш!?

2. Яна нимаймиш, шайх ҳазратларини бир шогирдлари тушда кўрганмиш, у кишига Аллоҳ Ўз жамолини кўрсатганмиш..!?

3. Шайх ҳазратларимиш, Бухорода «Мир Араб» мадрасасида ҳожатхона кесакларидан ишлатилганларини тозалаб юрганларида яқин биродарлари Акбаржон кўриб қолган эмиш. Шайх ҳижолат бўлиб: «Ахир бу кесаклар исроф эмасми!» деганмиш…

4. Фотиҳага Арабистондан иккита самолётда одамлар келганмиш…

5. Рамазон Қодиров жанозада қатнашганмиш…

6.Русиядаги китоб нашрларига асосий маблағни Рамазон берармиш…

7. «Камолон» масжиди ҳожатхонасини тозалаб чиққанларини бир киши ўз кўзи билан кўрган эмиш… Эмиш, миш, миш…

Ҳой, мусулмон биродарлар!

Бу гаплар билан марҳумни фазилатли инсон бўлганини таърифламоқчимисизлар?!

Фазилат шу каби миш мишлар билан таърифланадими?!

Аввалига ўзимиз билан ўзимиз овора эдик, бу каби гап сўзларга у қадар эътибор қаратмадик. «Ҳа, энди ҳиссиётда ёзишяптида», деб қўя қолгандик…

Лекин гап сўзларнинг ривожи шу даражага етдики, буларга жавоб ёзиб қўймасак, аҳвол янада кескинлашадигандек кўринди…Бу миш мишларни ёзаётганлардан кўра тарқатаётганлар кўпая бошлади…

Ҳайҳот…!

1. Жорий ойда Масжиди Набавийдаги бир минорага азон айтилганда яшил гумбазга қизғиш тус берадиган мослама қўйилганди. Буни саккизинчи март куни тажрибада синаб кўрилди. Ҳазратимиз ўнинчи март куни вафот топдилар ва бу икки ҳодисанинг бир бирига умуман алоқаси йўқ!

2. Туш масаласидаги гаплар ҳам ҳиссиётлар ғалаёни холос! Тўғри, солиҳ тушдан яхши гумонлар олиш бор нарса, лекин ундан ҳукм олинмайди. Ўзим гувоҳ бўлган бир неча ўринларда Ҳазратимдан шу каби тушлар сўралганида, тушга суяниб яшаш тўғри эмаслигини, аксарият ҳаёлпарастлар кўп туш кўришини айтгандилар. Туш кўраверадиган миллат ухлайверадиган миллатдир!

3. «Мир Араб»да ҳожатхона кесакларини тозалаб юрганлари ҳақидаги гаплар…Мен бу гапларнинг асоссиз эканини Акбаржон домланинг ўзларидан сўраб, суриштириб билган ишончли кишидан шахсан эшитиб билдим…

Зотан, бу каби ҳокисорлик ишлари оммага достон қилинадиган, фахрланиб гапириладиган ишлар бўлмайди…

4. «Камолон» масжиди таҳоратхонасида Шайх ҳазратларини «ўз кўзи билан кўрган» кишининг хабари ҳам уйдирма гап. Зотан, Ҳазратнинг бирор жойга ташриф буюришлари ҳеч қачон бехосдан, яширинча бўлмаган. Қаерга борсалар, ўша ердаги мутасаддилар кутиб олиб, кузатиб қўйишган. У кишининг ёнларида кечаю кундуз хизматда бўлган яқинларининг таъкидлашларича, Ҳазратимиз «Камолон» масжидининг таҳоратхонасига бирор марта ҳам кирмаган эканлар…

5.6. Рамазон Қодировнинг жанозага келганини «обрўли» ахборот агентликлари гапирди. Бу бекор гап. Ўша «обрўли»ларнинг эшиттиришларида Русиядаги китобларни молиялаштириш сафсатаси ҳам айтилганди. Бу гапларнинг ғирт туҳмат эканини билиб қўйишимиз лозим. Қизиқ… Мен қўштирноқ ичида «обрўли» деяётганим ахборот агентликлари ўзим гувоҳ бўлган ушбу мавзуда асоссиз гапларни очиқчасига, текшириб ўтирмай, миш−мишлаганча ёйинлашди…

Журналистика этикасига ҳам тупуриб юборишди. Журналистик суруштирув, деган жанр бор. Унда мухбир рақамлардан, саналардан жавобгар бўлади. Лекин ўша беобрў «обрўли»лар Шайх ҳазратларининг анча олдин тушган суратларини вафотларидан бир неча дақиқа олдинги сурат деб тарқатишди… Хабардаги сананинг қанчали ишончли эканини суриштириб ўтиришмади, жавобгарлик ҳақида ўйлаб ҳам кўришмади… Ўша «обрўли» ташкилотнинг ишончлилик даражаси ҳаминқадар эканини ҳам кўрдик…

Суф сизларга, ҳаминқадарлар!… Бу рўйхатни яна узайтириш мумкин. Лекин натижа ўзгармайди. Асоссиз гаплар асоссизлигича қолаверади!

Демак…

Хуллас, саййидимиз, устозимиз, шайх муфассир, муҳаддис, аллома, фақиҳ, зоҳид Муҳаммад Содиқ Муҳаммад Юсуф роҳимаҳуллоҳнинг қолдирган меросларини ўқиб ўрганишимиз, ундаги тавсияларга амал қилишимиз марҳумнинг фазилатига етарли эътироф бўлади. Бекорчи гаплар билан вақтларни беҳуда ўтказишимиз эса фақат ўзимизга зиёндир. Зотан у зотнинг фироқлари билан қалбларимиз маҳзун бўлди, кўзларимиз ёшланди фақат тилларимиз билан Раббимиз ёқтирмайдиган гапларни гапирмайлик! Ҳадиси шарифда Раббимизнинг миш мишларни, деди дедиларни ёмон кўриши зикр қилинган. (Бухорий ривояти)

Илмий карвонни ташлаб орқага чекинмайлик. Олимга муносиб муҳаббатда бўлайлик. Ҳаддимизни билайлик. Олимни ҳурмат қилмоқчи бўлсак, руҳларини шод этишни хоҳласак, марҳамат қилиб у кишининг қолдирган асарларини ўрганайлик, ўрганганларимизга чин дилдан амал қилайлик. Биздан лозим бўлган иш – Устознинг ҳақларида хайрли дуода бўлиб, асарларини ўқиб, уқишдир.

Салавоту саломлар Расули Акрамга бўлсин!

Аброр Мухтор Алий

22.03. 2015

Баҳам кўринг

3 комментария

  1. haydarovkamoliddin тарих:

    Ассалому алайкум в.б. хурматли сайтга мақола қойишга масъул бўлган ходимлар нима учун ислом.уз порталининг Ҳазратим бўлимида бир бирига зид қарама қарши бўлган мақолалар қояяпсизлар. Ахр бу сайтни Ҳазратим ташаббуслари билан очилган тириклик чоғларида бирор марта бунақа ҳолатка кузим тушмаган сайтни ҳамиша севиб ҳуддики ҳазратим билан бевосита гаплашаётгандек кириб ўқирдик. Энди вафот этишлари биланоқ мақолалар таҳрир қилинмай қолдими. Биз мухлислар нимага бу сайтни севиб,ўқиймиз чунки ишончли бўлгани учун лекин бунақа мутаъассиблик бўлаверса ислом.уз га бўлган ишончга путур етиб қолишидан бу сайтнинг мухлиси сифатида чўчияпман. Бу этирозим айнан юқоридаги « ДЕЗИНФОРМАЦИЯДАН ОГОҲ БЎЛИНГ!» мақоласини ўқиганимдан кейин пайдо бўлди. Бундан олдинги мақолаларни ҳам қолдирмасдан ўқиб келаман. Бу мақола айнан шу сайтнинг шу бўлимида қоилган мақолани ёлғонга чиқараяпди. Илтимос бундай ҳолатларга йўл қойманглар биз энди қайси мақолага ишонайлик. Ахр Ҳазратим ташаббуслари билан очилган сайтда ҳар бир мақола қаттиқ текширилиб ҳақиқат бўлганигина қоилади деб,ҳисоблаймиз.

    • Muslimaat тарих:

      Ва алайкум ассалом. Инсон хатодан холи эмас, бир марта бўлиб қолган нарсага дарров бундай ҳукм чиқармаслик керак. Балки аввал маълумотни бериб, кейин унга раддия қилгандирмиз.

  2. Abdullah тарих:

    Шайх хазратлари хакида бундай ноурин гапларни уйлаб топганларга Яратганнинг узи инсофи тавфик берсин. Унинг урнига хазратнинг хакларига дуо килсалар узларини хам гунохдан саклаган булар эдилар валлохи алам. Аллоҳ ўтганларимизни раҳматига олган булсин.

Leave A Reply