Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Керакли маҳсулотлар:

6 та тухум

ун

бир чимдим туз

қовуриш учун ўсимлик ёғи

суртиш учун қўй ёғи

2 стакан шакар

1 стакан асал

Тайёрлаш усули:

Аввал тухумни чақиб, бир чимдим туз билан аталаб оламиз. Кейин унга ун солиб, ўрта юмшоқликда хамир қорамиз. Хамир тингач, уни катта доира шаклида, 3 мм қалинликда ёямиз. Айлана хамирнинг ярмига қўй ёғи суртиб, уни иккинчи томонини букиб, ёпамиз.

Ярим айлана ҳосил бўлади. Устидан бир марта жўва ёрдамида енгил ёямиз. Кейин эса пичоқ ёки махсус гулли кесгич ёрдамида ўзимиз ёқтирган катталикда кесиб оламиз. Баъзилар гугурт чўпидек узунликда, айримлар эса 2,5 см га 5 см ўлчамда кесишади.

Сиз таъбингизга қаранг. Тайёр кесмаларни олиб, қиздирилган ёғда оқишроқ қилиб пишириб оламиз(жуда қизариб кетмаслиги, аммо ичи хом қолмаслиги керак). Хамирни оз- оздан ёққа солиб, човли билан тез- тез айлана бўйлаб ҳаракатлантирамиз. Шунда ёпишиб турган хамирлар очилиб, айлана шаклига киради. Ҳамма хамирни шу зайл пишириб оламиз.

Кейин эса устига қуйиладиган қиёмини тайёрлаймиз. Бунинг учун 2 стакан шакарга 50 мл сув қуйиб, бироз қайнатамиз. Юмшоқ шарик ҳосил бўлгач(сувга томизганда қиём шарик шаклига келиши ва қўл билан ушлаганда юмшоқ бўлиши керак), унга асални қўшамиз. Қайнаб чиққач, бир дақиқадан сўнг пиширган хамиримизга оз-оздан қуйиб, тез-тез аралаштирамиз. Бу пайт куйиб қолиш эҳтимоли бўлгани учун, қўлда эмас, балки восита ёрдамида аралаштирган маъқул.

Яхшилаб қиём ва хамир аралашгач, уни аввалдан тайёрлаб қўйган ликопча ва ёки бошқа идишларимизга шакл бериб, жойлаштирамиз. Бу жараён осонроқ бўлиши ва қўлимиз куймаслиги учун қўлимизни совуқ сувга ботириб-ботириб оламиз. Тайёр чак-чакни истаган кўринишимизда безатамиз. 

Умму Муҳаммад Билол