Умумжаҳон исломий хайрия ташкилоти

0 644

CHARITY

Умумжаҳон исломий хайрия ташкилоти  инсонпарвар ташкилотларнинг энг катталаридан ҳисобланади. У мустақил ташкилот бўлиб,  дунёнинг турли жойларида ҳар хил йўналишларда  ҳожатмандларнинг ҳожатини одам ажратмай, таассублик қилмай ҳамда сиёсий ва ирқий курашларга аралашмай қондиришда фаолият кўрсатиб келмоқда.

Умумжаҳон исломий хайрия ташкилотига 1984 йил Кувайт шаҳрида бўлиб ўтган исломий анжуманда шайх Юсуф Қарзовийнинг бир миллиард доллар жамлаш зарурлиги хақидаги чақириғидан сўнг асос солинган. У маблағни тижоратга қўйиб, келган фойдаларини эса камбағаллик, жоҳилликка қарши кураш ва беморларга ёрдам йўлида сарфлаш таклифини берган.

Ушбу хайрия ташкилоти «Бир доллар бериб, бир мўминни қутқар» шиори остида бўлган. Бу фикр эса кўплаб уламоларнинг, хайр-эҳсон ташкилотларининг ҳамда мутафаккирларнинг таҳсин ва мақтовларига сазовор бўлган. Шунда улар бу умумжаҳон хайрия ташкилотига асос солишга киришганлар. Кувайтликлар бу ташкилотга асос солишда катта ҳисса қўшганлар, жумладан,  марҳум Абдуллоҳ Алий  Мутоввиъ Абу Бадр, Юсуф Жосим Ҳажжий, Саид Аҳмад Базиъ Ёсин, Саъд Жосирларни зикрга олиш ўринлидир. Бошқа юрт вакилларидан доктор Абдуллоҳ Умар Насийф, Шайх Абдурраҳмон ибн Абдуллоҳ ибн Акийл ва бошқа Ислом уламолари ўз ҳиссаларини қўшган ҳолда унга асос солишган. Уларнинг сони 160 га етади.

Улар бу ташкилотга асос солишга қўшилиб, бу фикрни марҳум Амир Шайх Жобир Аҳмад Жобир Сабоҳ жанобларига тақдим килишган.  Шайх Жобир  жаноблари бу режага кўшилиб энг кўп ёрдамни берган ва қўллаб-қувватлаганларнинг биринчиларидан бўлган. Шу билан бирга бу ташкилот ўз ҳақ-хуқуқига эга эътиборли ташкилот дея эътироф килиниши ҳақида расмий амирлик қарорини чиқарган. Маркази Кувайт давлатида бўлиб, Кувайтдан ташқарида унинг шаҳобчалари бўлишига қарор қилган.

Шу зайлда ушбу муборак ташкилотга асос  солиниб,  инсониятга ёрдам ва хайр-эҳсонда ташкилот ўз меваларини бера бошлаган. Бугунги кунгача кўплаб мўмин ва мўминаларга ва бошқа дин одамларига ҳам ёрдам кўрсатиб,  Исломдаги инсонпарварликнинг улуғ намоёндаси бўлиб келмоқда.

Баҳам кўринг

Leave A Reply